طرائف زواج الدكتور من دكتورة

أولاً هيبقوا فاهميين اوي ان الرجاله اكتر عرضه للأصابة بــ إرتفاع ضغط الدم hypertension , الذبحة الصدرية angina ,يعني خد عندك في أي خناقه هتلاقيها بتزود علشان إنت تزيد وتزيد ... وفجاة severe hypertension ,وبالسلامة يا برنس ثانياً إنت لو مش متجوز دكتورة ممكن تشتغلها بالالفاظ يعني تقولها إنتي مجرد parasite " طفيلي " يا حبيبتي وهي مزاجها تمام وآخر نعنشة لكن بقي لو خناقة مع دكتورة هتلاقي قاموس مصطلحات لا حصر له ! ثالثاً حد يجيب ليا دكتورة بتعرف تطبخ ! تطبخ منين وإزاي وهتتعلم إمتي وهي طول الوقت ع الكتاب ! يبقي مفيش إلا إنت يا كميل يا أمور. هتتعلم فيك يعني هتتعلم فيك.. ! زيك زي المريض اللي بتتعلم فيه في إستقبال الجراحة ، اللي بيسوط تحت إديها من قلة البنج وهي ولا هى هنا ! إنت كذلك يا دكتور هتسوط بس مش من ألم الخياطة ! إنت بعد الأكل هتسوط في حتة تانية من acute diarrhoea " إسهال حــــــاد " ولو كنت من هواة قراءة القصص البوليسة وتريد معرفه سبب ما حدث لك بالامس كل ماعليك فعله أن تدخل بهدوء إلي الشقه في فترة إعداد الأكل . ولك أن تتخيل شقه مليانة دخان مع إنك مركب 3 شفاط توشيبا العربي في المطبخ ماركة " هويني هويني دي مراتي مطلعه عيني " ومروحه سقف 4 ريش ! وياسلام لو فكرت تدخل المطبخ تطمن عليها ..! يعني من بعيد كده ممكن تشوف وسط الضباب والسحب والأدخنة واحدة واقفة بعيد لابسه بالطو أبيض وكمامة علي وشها وبطرف صوابعها ماسكة السكينة وبتحاول تتوصل بعد 3 ساعات من وضع الفرخة علي النار ... هل الفرخه استوت ولا لسه ؟؟!! رابعاً علي السفرة بقي مش هقولك متاكل يا أحمد ولا إنت عندك anorexia " فقدان الشهية " ؟؟ لا أبداً ما أنا باكل أهو دا أنا حتي مش قادر أقاوم الجمال والحلاوة بتاعت الأكل بس خايف من اللي حصل امبارح ! وتضطر تاكل مجامله علشان اليوم يعدي ويحصل اللي حصل امبارح ... وهكذا ! خامساً لو حصل في يوم وتعبت بدور برد مثلاً لو واحدة مش دكتورة و إنت كنت ممثل قدير وعشت في دور الميت من التعب ! هتلاقي جنبك برتقال وعصير وشاي بليمون أخضر وكل شوية كمادات ميه ساقعة تنزل علي الدماغ السليم تتعبه .... الدكتورة بقي هتلاقيها عاااااااادي خالص مش قلقانة مش مضطربة ما هي عارفه آخرها كام يوم أو أسبوع وهتقوم تاني زي القرد ! وياريت علي قد كده بس لا يا جماعة دا خد عندك بقي كل شويه متقوم يا أحمد دول شويه common cold " برد عادي " أما لو فيروس شديد شويه زي acute hepatitis "إلتهاب كبدي حاد " أو ..... كفااااااااااااااااااااااااااااية يا مني كفاااااااااااااايه أنا قايم أروح المستشفي أرحمـ ! سادساً الهزار بقي هيبقي إزاي ؟ خليك كده في يوم طلبت معاك تتفرج علي التلفزيون وإذ فجأة لقيت قناه المولودي " melody سابقاً " ولقيت أغنية (الواد قلبه بيوجعه وعايز حد يدلعه) تلاقي بقي خفة دم محصلتش منها الواد قلبه بيوجعه أكيد دي main complaint " الشكوي الرئيسية " طيب تفتكر يا أحمد هو كده محتاج ايه" digitalis" ولا تفتكر كفاية " " beta blocker هاهاهاهاهاهاهاها ولو محصلش هزار يبقي أكيد الاغنيه هتفكرها بمريض heart failure مات تحت إديها وخد عندك بقي سرد بالتفصيل وللمرة المليون لنفس القصة ! وتحاول تقنعك بعد 15 سنه جواز إنها مكنتش غلطانة وانت بكل مواساة أيوه أنا عارف يا مني إنك مش غلطانة خلاص خلاص خلااااااااص !!! يخرب بيت ... بهاء سلطان اللي قلب عليكي المواجع. قلب ؟؟ .. فكرتني نسيت أقلب المكرونة ثواني وجاية إوعي تغير المحطة ! تقلب إنت بقي علي قناة للطرب الأصيل وتلاقي في وشك علي طول أم كلثوم بتقول " من فرحتي لا بنام ولا بصحي " وإنت سرحان بقي وبتفتكر الذكريات ! تلاقي صوت غريب من تحت الأرض ... آه صحيح ياأحممد المرحلة دي من coma "الغيبوبة " اسمها إيه بقي ؟ المريض لا هو نايم ولا صاحي! قومي وانتي طــــــــــ ... طلعتي عيني سابعاً لو خلاص انت ناوي بقي تتجوز دكتورة وهانت عليك نفسك ! يبقي نصيحه إبعد عن تخصص النساء و الأطفال ! ليه بقي ؟؟حد يقولي ليه ؟؟!! مبدئياً كده في النساء هيطلع عينك كل شوية .. أحمد تفتكر المغص دا عادي ولا في مشكلة ؟ أي نعم أنا درست نساء بس إنت عارف بقي التخصص يا أحمد بيديك خبرة أكتر! أحمد اصحي أحمد اصحي أنا محتاجه أشوف baby في وضعه السليم ولا لاء دلوقتي يا مني الساعة 3 الفجر ! أمال إنت متخصص نساء ليييييييييييييييه اه قول لييييييييييييه ! وطول 9 شهور بقي متابعةمن النوع اللي يطلع العين ويقرف اللي ما يتقرف 1 وطبعا إنت مطالب تفهمها كل حاجة وهي بكل رخامة ... تصدق أول مره أعرف الكلام داإحنا مكنش حد بيقول لينا الكلام دا في الروند ! وكذلك تخصص الاطفال مع إختلاف الفتره ومن تهتم به يعني في الاطفال هتهتم بطفل أو اتنين انت وحظك بقي وربما يمتد الإهتمام الي تغيير البامبرز ! ********** Just For Fun