Tuesday 16 August 2011

كيفية لعب الاستيميشن

دة شرح تفصيلي تفهم بيه اللعبة من اولها لآخرها

قبل أولا : مبادئ عن الكوتشينة لمن لا يفقه فيها شيء
الكوتشينة 52 ورقة ، 13 ورقة من كل شكل ، يعني 4 أشكال
ترفل : اللي هو زي الشجرة السودا وكارو : السمبكوسة وهارت: القلب طبعا وسبيد أو بج : القلب الاسود

أولا: فكرة اللعبة
عدد اللاعبين : أربعة
اللعبة مبنية على فكرة "اللمة"
بمعنى ان انا ارمي ورقة واللي بعدي يرمي ورقة من نفس الشكل والتالت والرابع (ودة كدة اسمه راوند او لفة) .. ونشوف .. اللي ورقته اعلى ورقة يبقى هو اللي ياخد الاربع ورقات دول على جنب ويبقى كدة معاه لمة واحدة ويبدأ هو الراوند اللي بعده وهكذا .. وطبعا بما ان الكوتشينة 52 ورقة مقسمة على 4 لاعبين كل لاعب 13 ورقة فبالتالي بعد 13 راوند هيكون كله خلص ورقه ونشوف كدة كل واحد كام لمة (ودة يبقى نهاية الدور) .. يلاحظ طبعا ان ترتيب الورق من حيث القيمة من الاصغر للاكبر هو 2 3 4 5 6 7 8 9 10 ولد ( فاليه أو فال أو جاك) بنت (دامة أو دام) شايب (روا وأحيانا كنج) 1 (آس)

ثانيا : قواعد اللعبة :
قبل بداية كل دور كل لاعب بيحدد هو هيلم كام لمة بناء طبعا على قوة ورقه .. اللي ماعاهوش غير اتنينات وتلاتات بيطلب صفر (داش) واللي ماعاهوش غير آسات ورواهات بيطلب عالي وهكذا ..
وفي نهاية الدور بنشوف كل واحد لم اللي هو طلبه بالظبط ولا لا .. سواء كان زايد او ناقص عن اللي طلبه يبقى خسران .. لازم يلم اللي طلبه بالظبط
ويتحسب السكور زي ما هقول في الآخر .. ونفنط الكوتشنة ونبدأ دور جديد وهكذا ... وتستمر البولة لعدد من الأدوار يتفق عليه من البداية حسب الوقت المتاح لديكم ... ويضاف السكور اولا باول كل دور وفي النهاية نشوف مين اللي صاحب اعلى سكور .. يبقى كنج والتاني سب كنج والتالت سب كوز والرابع كوز
الأصل في اللعبة ان عدد الادوار 18 دور ... لكن بعض الناس تلعبها 19 (بإضافة الدور رقم 13 داش ) وطبعا احيانا تلعب ب 14 دور فقط (بولة صغيرة) اذا كان الوقت ضيق لكن الأشهر هو 18 دور

ثالثا : القوانين :
اليل فات دة كان الفكرة العامة للعبة
نخش عالقوانين

أ- ترتيب اللعب:
يبدأ باللعب اول الدور صاحب اعلى طلب (اكتر واحد قال انه هيلم لمات) ثم اللي على يمينه وهكذا لغاية الرابع وينتهي الراوند .. ويبدأ الراوند الجديد بصاحب اللمة .. وهكذا

ب- الأشكال والقطوع:
كل شخص مجبر (إجباااار .. لأن الغلطة دي دايما يقع فيها المبتدئين) أن يلعب نفس الشكل اللي بدا (فتح) بيه اول واحد (بنسميه الأرض) طالما انه معاه منه .. لغاية اللاعب الرابع وبعدين اللي لم من حقه يلعب الشكل اللي يناسبه ويجبر الباقيين على لعب نفس الشكل طالما معاهم
مثال : أنا بدأت بلعب كارو يبقى كل اللاعبين لازم يلعبوا كارو طالما معاهم .. واللي يلم اللمة من حقه يلعب الشكل اللي هو عايزه وليكن ترفل وكله يلعب ترفل واللي يلمها يلعب اللي هو عايزه
وهنا يتبادر سؤال .. طب افرض مامعاهوش يعمل ايييييه ؟؟؟
هنا بيكون ادامك حل من اتنين (بس اتأكد الله يكرمك انك مامعاكش من الشكل الملعوب الاول عشان ماتعملش مشكلة في اللعب)
يا اما تلعب اي شكل تاني وهتكون ورقتك مالهاش قيمة في الراوند دة ... بمعنى لو انا فتحت باتنين كارو حتى وانت مامعاكش كارو ولعبت انشالله آس ترفل ماتكسبنيش .. لازم الورقة الكسبانة تكون من نفس شكل أول ورقة في الراوند (الأرض)
يا اما الحل التاني العكس تماما .. تلعب ورقة من شكل معين يتفق عليه قبل كل دور ويسمى بالقطوع (يعني كل دور يتم اختيار القطوع في اوله)
الشكل دة بئة على العكس تماما لو انا لعبت ان شالله آس كارو وانت مامعاكش كارو فلعبت ان شالله 2 من شكل القطوع دة وليكن سبيد الا انت السبيد هي اللي تكسب لأنها قطوع
طبعا انت بتحدد هتلجأ لانهي حل من الاتنين دول على حسب موقفك طبعا .. يعني ممكن تكون مش عايز لمات تاني ولميت اللي انت طالبه يبقى مش هتقطع طبعا بل كمان ممكن تلعب آس من شكل تاني طالما انت مش عايز تلم تاني ودة اللي بيسمى سكرتة يعني تلعب حاجة (خصوصا كبيرة) مش من نفس الشكل الملعوب عشان تخلص منها لانك مش عايز تلم بيها ..
طبعا لا داعي للتنبيه ان لو الأرض قطوع يبقى كله لازم يلعب قطوع طالما معاهم .. لان برضه المبتدئين احيانا بيقولوا ف عقل بالهم طب العب قطوع ليه ما اوفره لوقت عوزة ..!!
بكرر على التأكد انك مامعاكش من نفس شكل الأرض قبل ما تفكر تلعب شكل تاني مالوش قيمة او تفكر تقطع

ج- كيفية تحديد القطوع قبل كل دور
هنا بئة محتاجين تركيز ..طبعا وضح في النقطة السابقة اهمية القطوع .. وازاي ان ورقة قليلة منه ممكن تحرق آس .. وبالتالي ازاي هنتفق على اختيار القطوع قبل كل راوند إذا كنت انا ممكن ابقى عايزه كارو وانت ترفل وغيرك سبيد !!
طبعا كل واحد بيبقى نفسه ف قطوع معين لانه معاه ورق كتير منه مثلا الدور دة وغيره معاه ورق كتير من شكل تاني ونفسه يكون هو القطوع
فظهرت فكرة المزاد لاختيار القطوع ...
في الاول هقربلكم الصورة بس .. هيبدأ مزاد بين الاربعة لاعبين على عدد اللمات اللي هيلمها كل واحد فيهم بناء على ورقه .. وطبعا اللي يحس انه مش قادر يواكب المزاد ومش هيقدر يلم اكتر من اللي قاله بيسكت وخلاص
وبعدين اللي هيقول انه هيلم اكتر عدد من اللمات يبقى كسب المزاد وهو اللي يختار القطوع
طبعا مش دة اللي بيحصل بالظبط لكن انا قربت الصورة كتير جدا
طبعا كل واحد وهو بيزايد . بيزايد بناء على ان القطوع اللي هيختاره هو اللي هيمشي واذا خسر المزاد وقطوع تاني هو اللي اتقال يبقى خلاص هو مش ملزم باللي قاله لانه كان باني كلامه عالقطوع اللي هو اختاره
دلوقت .. ظهرت مشكلة .. افرض انا قلت اني هلم اربع لمات وقطوعي كذا وانت قلت انك برضه هتلم اربع لمت وقطوعك كذا .. وماحدش فينا قدر يزود عن كدة يبقى ازاي الحال ؟؟ مين فينا اللي كلامه يمشي ؟؟
مش معقول طبعا اللي قال الأول والا تبقى فوضى وند نتخانق مين قال الأول وتبق كراسي موسيقية مش استميشن
فعملوا قاعدة مهمة في الطلب (الكول) أثناء المزاد دة .. أكرر ان القاعدة دي لا تطبق الا على المزاد بس مالهاش دعوة بداخل اللعب
رتبوا الأشكال من الاضعف للأقوى كالتالي .. ترفل - كارو - هارت - سبيد - بدون قطوع (صانز.. وهشرح كمان شوية يعني ايه بدون قطوع)
فلو انا طلبت اربعة لمات في المزاد وقلت اني هختار القطوع ترفل (وتنطق اربعة ترفل في المزاد) اللي عايز يعلي عليا ممكن يقول اربعة هارت (يعني هيلم اربع لمات لو القطوع بئة هارت) في الحالة دي هو اللي كلامه يمشي
وانا لازم اقول خمسة ترفل لو حبيت امشي قطوعي .. وابقى مطالب بلم خمس لمات ... ودة لان الهارت اقوى من الترفل
ولو انا لقيت اني مش هقدر الم خمس لمات حتى لو كان القطوع ترفل زي ما انا عايز هسكن واقول باص وخلاص ... وساعتها من حق واحد تالت انه يقول 4 سبيد او 4 صانز لانهم اعلى من الهارت لكن ماحدش يقدر يقول كارو او ترفل لانهم اضعف
ولو حد عايز يختارهم قطوع يبقى لازم يعلي عالأخ اللي طالب هارت دة
رسي المزاد على الاخ ابو هارت يبقى القطوع هارت خلاص ولم يعد بامكانه التراجع في طلبه
اما موضوع الصنز دة فمعنها ان مفيش قطوع .. يعني الورقة الاعلى من نفس شكل الارض هي اللي تلم ومفيش حاجة اسمها قطع
يعني التلات اشكال غير الارض كلها عديمة القيمة
بمعنى .. لو انا مثلا في احد الراوندات ف وسط اللعب او اخره فتحت باتنين كارو وكان الكارو خلص من الكل وماحدش معاه كارو تاني والدور صنز يبقى كل واحد هيلعب اي كارت من اي شكل من التلاتة التانيين وكدة كدة الاتنين الكارو دي هتكسب (هتلم) ان شالله يا رب تلعبوا عليها 3 آسات
ادوار الصانز هي ادوار عالية الاحتراف وماينصحش للمبتدئين بطلبها
مثال لكول
أدهم : اربعة كارو <المصطلح الرسمي اللي معناه هلم اربع لمات لو (ودة اللي انا عايزه) القطوع بئة كارو>
عبعاطي : اربعة سبيد
أدهم : اربعة صنز
حليم : خمسة ترفل
أدهم : خمسة صنز
حليم : ستة ترفل
أدهم : ستة سبيد
حد هيعلى على كدة يا جدعان ؟؟ لا .. خلاص رسي الكلام على أدهم والقطوع بئة سبيد
لاحظ ان ادهم غير القطوع اللي هو بيطلبه ودة من حقه

د- الكول بعد اختيار القطوع .. وقاعدة مالكش كام .. وقاعدة التثبيت
بعد ما رسي الكول على أدهم والقطوع بئة سبيد بنتاكد منه اذا كان دة آخره ولا يحب كمان يزود على كدة (تذكر ان الربح يكون في حالة تحقيق عدد اللمات المطلوبة فقط لا ازود ولا اقل)
طبعا مش مسموحله يقلل امال احنا رسينا المزاد عليه ليه ان شاء الله ؟؟
مسموحله يثبت على الستة او يزود ومسوحله كمان يغير القطوع بالزيادة برضه يعني مسموحله يقول طب خليها ستة صنز لكن مش مسموحله يقول طب خليها ستة هارت او كارو او ترفل
ممكن سبعات بئة اذا عايز المهم انه ماينفعش يقلل عن الكلام اللي رسى المزاد عليه
وبالترتيب من على يمين صاحب الكول يبدأ كل واحد بالترتيب يقول هو هيلم كام لمة (اللي بناء عليه هيتحاسب اذا كان كسب ولا خسر في نهاية الدور) والاختيار خلاص مالوش دعوة بالمزاد .. والقطوع اتحدد خلاص
يعني الكول رسي على ادهم ستة سبيد .. وقرر انه مش هيزود عن كدة ...يقوم اللي بعدده يقول هو هيلم كام لمة بناء على ان القطوع سبيد ثم اللاعب الثالث
ثم الرابع وهنا تاتي قاعدة ماليش كام او دونت كام؟؟
قبل ما الرابع يقول طلبه بنجمع طلبات التلاتة التانيين ..
طبعا احنا اتفقنا ان عدد لمات كل دور 13 لمة
تخيلوا معايا الموقف التالي
ادهم طلب 6 وعبعاطي 4 وحليم 2 وفؤاد 1
كدة مجموع الطلبات بقة بالصدفة 13
وبكدة ممكن ادهم يلم 6 وعبعاطي 4 وحليم 2 وفؤاد 1 فعلا وكله يبقى كسبان !!!
دة كلام طبعا ماينفعش !!
لازم يكون فيه خسرانين في كل دور
عشان كدة بيمنع تماما ان الرابع يطلب الطلب اللي يخلي مجموع الطلبات 13 .. لازم مجموع الطلبات
يكون اكتر او اقل من مجموع اللمات الفعلية اللي هو 13 بحيث انه لا يمكن يكون الكل كسبانين ابدا
يا اما واحد مش هيلاقي لمة يا اما واحد هيلبس لمة زيادة على الأقل
معظم الناس المبتدئين مبتفهمش ايه معنى الكلام دة لكن بالتجربة هيتفهم
وبالتالي في المثال المذكور يمنع على فؤاد ان يطلب لمة واحدة لان مجموع طلبات التلاتة التانيين 12 وبما انه ممنوع يخلي المجموع بيه 13 يبقى لازم يطلب اي حاجة غير الواحد
وفي الحالة دي بيتقال له مالكش واحد او دونت واحد .. ويقول اي حاجة غير الواحد سواء اكتر او اقل
لو فرضنا انه قال 2 يبقى احنا كدة طالبين 14 لمة في الوقت الل مافيش غير 13 بس .. يعني اللي يلحق ياخد قبل فوات الاوان والخسارة .. وبيتسمى الدور أوفر .. أما اذا طلب صفر (داش) يبقى احنا كدة طالبين 12 لمة يعني بعد ما كله ياخد اللي عايزه هيفضل لمة زيادة ماحدش عايزها ودي حد هيلبسها ويخسر وبيتسمى الدور دة دور أندر
كمان بيتسمى الدور اندر كام او اوفر كام على حسب عدد اللمات الزيادة يعني لو مجموعنا 15 يبقى الدور اوفر 2
لو مجموعنا 10 يبقى الدور اندر 3 .. وكل ما يزيد الرقم دة كل ما يكون الدور اكتر صعوبة لان دة معناه ان عدد اللمات الناقصة او عدد اللمات الزيادة اللي هنلسها بقى اكتر
فاضل حاجة واحدة بس على موضوع الكول ... نقطة التثبيت ...
لاحظتو في المثال السابق ان اخر كلام رسي عليه ادهم هو السبيد .. لاحظوا ان عبعاطي في الاول كان طلب سبيد هو كمان .. هنا بتطبق قاعدة التثبيت
بمعنى ان بعد انتهاء المزاد ... اي حد (زي عبعاطي مثلا) كان طلب نفس الشكل اثناء المزاد مش من حقه انه يقلل او يزود طلبه بعد انتهاء المزاد يعني يبقى اتثبت على اربعة طالما ان القطوع النهائي هو كان بيطلبه في الاول .. من حقه بس انه يطلب نفس طلب صاحب الكول اذا كان يقدر عليه
ودة بيسمى (وذ) يعني ادهم كان طالب ستة ومثبت عبعاطي على اربعة يبقى عبعاطي مش من حقه يقول 3 ولا 5 ولا اي حاجة مسموح بس يقول 6 وذ (معاك يعني) ودة برضه بيكون بالتأكيد عليه قبل ما كل واحد يقول هو هيلم كام ... يعني اللي بيتثبت بنسأله في الآخر : ها يا عبعاطي هتعلى 6 وذ ولا هيتثبت على اربعة ؟؟
وهو يقرر وغالبا بيقرر انه يتثبت لانه غالبا بيبقى صعب انه يقول وذ وينجح في تحقيقها (يعني اذا كان هو هيحقق 6 وصاحب الكول 6 امال الخروفين التانيين اللي قاعدين دول قاعدين يتفرجو يعني!!
المهم .. لو قرر ياخد وذ يبقى هيكون ليه سكور كأنه صاحب الكول والسكور هششرحه في الآخر

هـ - أخيرا اللعب
صاحب الكول يفتح في الكالار (الشكل) اللي هو عايزه ويمشي اللعب بالطريقة السابق ذكرها حتى انتهاء اللمات كلها ونشوف مين اللي حقق طلبه بالظبط ومين اللي خسر ويتم حساب السكور ولم الكوتشينة وتفنيطها وتفريقها ومزاد جديد ودور جديد ويجمع السكور اول باول
لحد نهاية ال 19 دور ونشوف مين الكسبان

و - الأفويد
الواحد لو كان من بداية اللعب بالصدفة كان ممعاهوش شكل معين نهائيا (فويد) بيقول انه فويد من غير ما يقول هو فويد انهي شكل
في ناس بتعتبر دة قانون عشان مايجيش واحد ينزل بآس ف اول لعبة يفاجأ انه اتقطع عليه من اولها ... وناس لأ ...
الكلاسيك انه لأ بس انا كل اللي لعبت معاهم مؤخرا بيلعبوا كدة !
مثال
انا اول ما خدت الورق لقيت معايا 7 كروت ترفل و4كروت كارو وكارتين هارت
ابق انا كدة فويد سبيد .. هقول انا فويد كالار يا جدعان بس مش هقول هو ايه .. بس كدة
رابعا الفنيات الأساسية
طبعا باللعب هتبدأ تتعلم حاجات كثيرة فنية .. حاجات مالهاش علاقة بالقوانين دي ليها علاقة بالخبرة .. بس اللي هقوله دلوقت دة فنيات اساسية لازم تكون ملم بيها
بكرر ان دي فنيات فقط مش قوانين يعني مافهاش اجبار

أ- ترتيب الورق
اول ما بتستلم ورقك بترتبه كل شكل لوحده ومن الصغير للكبير ويستحسن ماتحطش الكاروهات جنب الهارتات او السبيدات جنب الترفلات عشان اللبون ممكن يلخبطك
حطهم ترفلات - كاروهات - سبيدات - هارتات

ب - عد الورق
في الاول هيكون الموضوع دة صعب عليك لكن بالخبرة هتتعود وهتعرف انت عايز تعد ايه وماتعدش ايه
بس ابدا الاول باللي لازم ولا بد انك تعد القواطيع اللي نزلت لحد دلوقت كام ... لان دة بيديك معلومات عن القواطيع اللي فاضلة مع الناس
يعني هل في خطر ان حد يقطع عليك ولا مفيش لانك متاكد ان القواطيع اللي نزلت + اللي فاضل معاك = 13
لما تتمرن اكتر هتبتدا مش بس تعد عدد .. لا كمان تعرف ايه اللي نزل الآس الكارو اتلعب ولا لا .. يعني العب الروا الكارو وانا متطمن انه هيلم
ولا لا مانزلش يبقى في خطر لو لعبت الروا الكارو حد يركبه بالآس ؟؟
لما تحترف اكتر مش بس هتركز عالآسات والرواهات دة انت كمان هتعد التلاتات والاربعات عشان هييجي وقت هيكون معاك مثلا 4 كارو
ومانتاش عايز لمات تاني ... ولازم تفتكر كويس هو في حد لسة معاه كارو ولا الكارو خلص وممكن الم بالاربعة دي لو ماحدش قطع عليها
ولو افتكرت ان فاضل كارت يا ترى الكارت دة اقل من الاربعة وبكدة برضه هلم بالاربعة لو ماحدش قطع ولا اكتر منها وهلبس الزبون اللي معاه الكارت دة اللمة دي واطلع انا منها ؟؟؟
طبعا انا مش بطالب المبتدئ انه يتعلم كدة ف بولة ولا اتنين
انت عايز شهور وشهور من اللعب عشان توصل لمرحلة زيي مثلا بحفظ كل كارت اتلعب ف كل كالار يهمني
(يهمني يعني ممكن ماتشغلش نفسك اوي مع كالار خلص من عندك وكمان ماهواش قطوع)
وتركز كمان مع الكروت اللي بتتسكرت لانها ممكن تكون وسيلة مكسبك او سبب خسارتك

ج - ماتخسرش لوحدك
في المثال السابق ادهم طلب 6 وعبعاطي 4 وحليم 2 وفؤاد مالوش واحد فطلب 2
الدور كدة اوفر واحد
كل واحد خد لماته بسرعة قبل فوات الأوان
وفي النهاية لقينا ان ادهم لم 6 وعبعاطي 4 وحليم 2 وفؤاد 1 بس يبقى فؤاد هو الوحيد الخسران
معظم الناس (ودة كلاسيك اللعبة) بتحسب عقاب زيادة في السكور على اللي يكون الوحيد الخسران في اللعبة
وبالتالي لازم تحاول على قد ما تقدر تخسر حد تاني معاك اذا كنت مية فالمية خسران
يعني مثلا .. فؤاذ اثناء اللعب جاتله فرصة انه يلم اول لمة ليه وهو طالب لمتين ... بس هو متاكد مليون فالمية انه مش هيعرف يلم كمان لمة لو عمل ايه
فقرر انه مايلمش اللمة الاولانية دي اصلا مع انه كان ممكن يلمها (مالمهاش بس قانوني يعني مثلا كان بامكانه يقطع بس ماقطعش ولعب كارت من شكل غير القطوع عشان مايلمهاش)
وبكدة هيكون في نهاية كانه ساب لمتين .. واحدة اللي هي تظبط الدور لانهم اصلا طالبين 14 لمة والتانية دي في واحد زبون هياخدها فوق لماته المطلوبة يبقى هو كمان خسران
يعني مثلا ادهم 6 عبعاطي 4 حليم 3 فؤاد 0 وبكدة حليم وفؤاد خسرانين وفؤاد هو اللي خسر حليم لما حس انه كدة كدة هيخسر
ودة بيسمى بيع .. او بيع إيدك .. يعني نقول هنا ان فؤاد باع إيده .. عشان يخسر حليم
ودة بيبدا يبان لما مثلا نفاجأ بفؤاد ف وسط اللعب اتعمد يحرق كارت عالي روا مثلا بانه يسكرته
او يلعبه مع ان في آس ملعوب في الراوند وكدة كدة الروا مش هيلم .. إلخ ساعتها بنفهم ان فؤاد باع وبنتعامل وكأن الدور اندر مش اوفر عشان فؤاد بيلعب كانه طالب 0 مش 2
نفس الكلام بسري عالادوار الاندر .. لو لقيت نفسك لميت اللمة زيادة حاول بسرعة تاخد كمان لمة زيادة عشان واحد غيرك مايلاقيش وتبقى انت خسرته معاك

د - شطف القواطيع (الطرنبة)
طبعا الورق بيتوزع عالكل ف اول اللعب وبيجيلك عشوائي
يعني التلاتاشر ورقة بتوعك ممكن يكون 3 ورقات ترفل و3 كارو و 3 هارت و4 سبيد
وممكن كمان يكونوا 10 ورقات ترفل وورقة كارو وورقة هارت وورقة سبيد
كل شيء جايز .. المهم ..
لو فرضنا ان توزيع الورق كان بالشكل الاول (عدالة توزيع) مع كل الناس ودة نادر جدا جدا
وهنفترض انك معاك آس روا دام كارو بدأت تلعب بالآس كله لعب كروت صغيرة لانك كدة كدة هتلم
وانت خدت اللمة وفتحت روا كله لعب اي هس وانت خدت اللمة ولعبت دامة وكله لعب هس ساعتها هتبقى لميت اللي انت عايزه وتمام التمام
لكن لو فرضنا ان مفيش عدالة التوزيع دي .. وان انا معايا 3 كاروهات وغيري معاه 5 وغيري معاه 3 وغيري معاه 2 بس
ساعتها هلم بالآس والروا ولما اجي العب الدامة هيكون الاخ الرابع ماعادش معاه كارو وممكن يفكر يقطع عليا اذا كان عايز
وبالتالي اذا كانت الدامة دي مهمة جدا ف اني اكسب هتبقى اتحرقت وابقى خسرت
في الحالة دي (حالة انك معاك حاجة بعد الآس وخايف حد يقطع عليها) لازم تبدأ بشطف القواطيع ..
بمعنى انك تفتح قطوع وبالتالي كله يضطر يلعب قواطيع وهكذا لحد ما تتاكد ان اللي نزلوه من القواطيع زائد اللي فاضل معاك 13 يبقى كدة ماعادش فاضل قواطيع غير معاك
كدة تلعب وانت مش خايف من خطر القطع
طبعا واضح ان دة يتطلب ان يكون معاك قواطيع كتيرة .. داهية تشطف قواطيع وانت اصلا ماعاكش غير اربع قواطيع تلاقي قواطيعك خلصت وواحد غيرك لسة معاه
... لازم يا جماعة تكونوا فاهمين ان اي تصرف بوصفه بانه تصرف غبي ممكن تعمله عن عمد لاي سبب من لاسباب وتكسب برضه مفيش مشاكل
كل راوند وليه ظروف خاصة بيه
الطرنبة ممكن تكون سلاح ذو حدين .. ممكن مثلا تتطرنب فيكون واحد كان عامل حسابه انه هياخد اي لمة بقواطيعه لكن لما انت خلصتهاله ممكن يقرر يبيع إيده وفجأة تلاقي نفسك
بتلم لمات ماكنتش عامل حسابك عليها لانه سابلك اللمات اللي هو كان المفروض يلمها عشان يخليك تحرم
في الحالات اللي زي كدة ممكن تبدا الاول بالكروت اللي ممكن تلم بيها لو قرروا يخسروك وممكن ماتلمش بيها لو بيلعبوا عادي
وانت اصلا مش عايزها لمة ... يعني مثلا عشراية .. تسعاية .. او روا واقف (واقف يعني مامعوش ولا كارت تاني من نفس الشكل وبالتالي لو حد فتح الآس هتتضطر تحرقه غصب عنك ولو الآس ماتلعبش هتلم بيه يعني مش
ممون هو لمة ولا مش) في الحالات دي تبدأ بيها .. والله لو لم .. يبقى تحرقلك كارت من قواطيعك (يعني تلعب كارت صغيسر كدة كدة حد هياخده منك) مالمش يبقى تطرنب عشان حتى الكارت الصغير دة يلم في الآخر عشان مفيش اعلى منه
هضربلكم مثال
دة ورقي:
ترفل(قطوع): آس روا دام سبعة خمسة اتنين
كارو : دام تسعة خمسة
هارت : آس روا اربعة
سبيد : روا
وانا طالب ست لمات
المفروض اللمات اللي مضمونة مضمونة .. الاس والروا الهارت والاس والروا والدام القطوع وابقى عايز لمة كمان
يا اما الروا السبيد او الدام الكارو او كارت من القواطيع
هنا مش مستحب اطرنب .. لاني لو لعبت الاس وراه الروا وراه الدام القطوع هنزل تقريبا كل قواطيعهم .. ساعتها ابقى هلم ببقية قواطيعي
لان ماعدش في قواطيع اكبر منها
بمعنى اني لميت 3 لمات واكيد هلم كمان 3 (لاحظ يا مبتدئ ان القواطيع دي حاجة ماينفعش تتسكرت الا تحت قطوع اكبر منها ... يعني ماينفعش الناس تلعب شكل وانت مايكونش معاك منه تقوم لاعب قطوع
وتقوللهم مايحسبهوش قطعة .. هتلم هتلم .. طالما ماعادش في قطوع اكبر) ويبقوا كدة الستة بتوعي
طب هنيل ايه بئة فالآسات والرواهات اللي معاييا دي !! هبلعها ؟؟ مانا كدة هلم زيادة
يبقى كدة غلط
انا ابدأ بالحاجت اللي مش ضامن هتعلم ايه
والله لو الروا السبيد والدام الكارو مالموش وحد ركبهم بآس ولا حاجة تبقى محلولة ابقى انا كدة عارف اني لازم الم ب اربع قواطيع مع الآس والروا الهارت
.. اول ماتجيلي الهاند تاني (لما اخد بالآس الهارت مثلا) هحرق قطوع (افتح الخمسة مثلا) ولما تجيني تاني (لما اخد بالروا الهارت مثلا) افتح بالاتنين القطوع واحرقهم هي كمان
ويتبقالي اربع قواطيع هلم بيهم
ابدأ بئة اخلص الورق اللي مالوش لازمة وفي الوقت المناسب اخد بالارع قواطيع بتوعي وابقى كسبت
لو فرضنا اني طالب تمانية مثلا يبقى مش هحرق اي قواطيع لاني لازم الم بيهم كلهم اذا الروا السبيد والدام الكارو مالموش
يبقى في الحالة دي هطرنب وادعي اقول يا رب مايكونش حد معاه اكتر من تلات قواطيع (لاحظ ان معايا 6 قواطيع يعني الباقيين معاهم 7 بمعنى ان لو متزوعين بعدالة يبقوا 2 و 2 و3
وبكدة هقدر انزلهم كلهم تحت الآس والروا والدام القطوع لكن لو محصلش عدالة توزيع هيبقوا مثلا
4 و 2 و 1 ساعتها لو ابو 4 كروت دة ناويلي يبقى مش هعرف اخد كل قواطيعه)

انا حاسس ان موضوع الطرنبة دة مش هيتفهم غير عملي بس انا حاولت اوضحه على قد ما اقدر

وقبل ما نقول السكور .. في قواعد كتيييييير جدا فنية هتتعلمها في اللعب لكن انا حاولت اقول الحاجات الاساسية جدا

أخيرا : السكور :
طبعا فيه مليون طريقة لحساب السكور ... انا هقول اهمهم مع التأكيد على ان مش مهم الطريقة ايه
المهم انها هتتنفذ عالكل ومن اول ددور لاخر دور في التسعتاشر دور ويستحسن قبل ما تبدأوا البولة
اذا كنتم غرب عن بعض ومش متعودين على طريقة معينة تتفقوا عالطريقة بالذات فيما يخص التمانية والداش كول والأونلي والصعايدة وقلب الكلارات
والكلام دة هوضح معناه دلوقت

طريقة الحساب الأسهل والأشمل
الطريقة دي ليها بعض العيوب لكن ميزتها الحساب السريع لدرجة اني لما بطبقها مع صحابي
بلحق احسب وارتب ورقي قبل ما يرتبوا ورقهم
والحساب السريع بيخلي اللعب سريع عشان بتعرف تحسب ف دماغك بسرعة انهي احسن مثلا تخسر وتخسر حد معاك ولا ايه .. إلخ
المهم ..
الطريقة كالتالي
اللي بيحقق طلبه بياخد سكور = طلبه + 10 نقط
واللي يخسر ينقص طلبه بس
الكول +10 او -10 في المكسب او الخسارة
اللي يبقى هو الوحيد الكسبان (أونلي وينر) = 10 إضافية
واللي يبقى هو الوحيد الخسران (اونلي لوزر) = -10 إضافية
اللي يحقق صفر (داش) ف دور أندر = + 10 كمان
اللي يخسر داش ف دور أوفر = -10 كمان
الداش كول = + أو -10 عن الداش العادي في المكسب والخسارة بالإضافة لقاعدة الأندر أو الأوفر
(الداش كول هو انك تطلب داش من قبل ما اي حد يتكلم كلمة في المزاد يعني بغض النظر عن القطوع ... لو حبيت الناس متتلكمش لحد ما تتأكد انت هتتطلب داش كول ولا لا قول ويت فور داش
يعني استنوا هقول داش ولا لا .. عشان لو ماقلتش كدة وحد طلب يبقى مالكش داش كول خلاص)
اللي يحقق تمانية طالبها 64 واللي يخسرها -32
تسعة ب 81 وخسارتها -40
عشرة 100 وخسارتها -50
حداشر ب 121 وخسارتها -60
اتناشر (إن وجد الكلام دة) 144 وخسارتها -72
تلاتاشر (كبوت) 169 وخسارتها -84
الريسك + او - 10 في المكسب او الخسارة (الريسك هي اللي يحصل عليها الرابع في الطلب اذا طلب يخلي الدور اوفر 2 او 3 او اندر 2 او 3)
الدبل ريسك +20 او -20 (يعني تخلي الدور اوفر 4 او 5 او اندر 4او 5)
وهكذا للتربل ريسك .. إلخ
الدور الصعايدة هو الدور اللي يخسر فيه كل الاربعة لاعبين
مايتحسبش فيه سكور ويلعب الدور اللي بعده بسكور دبل
اذا اللي بعده طلع صعايدة هو كمان يكون اللي بعده في تلاتة (مش ف اربعة)
الوذ طبعا زي الكول ليه + او -10 زيادة في المكسب او الخسارة
ادوار الكالارات
هي خمس ادوار بعد الدور التلاتاشر يكون القطوع محدد مسبقا الدور الاول ترفل ثم كارو هارت بيج صنز (ممكن العكس من الصنز للترفل)
يبدأ بالكلام في دور الترفل الشخص اللي بعد اللي معاه الاتنين الرتفل ويحدد عدد لماته بناء على ان القطوع ترفل وهكذا وصاحب اعلى طلب يكون هو الكول ويبدأ اللعب
الدور اللي بعده يبدأ بالكلام اللاعب اللي بعد اللاعب اللي اتكلم اول الدور اللي فات وهكذا بحيث يتكلم كل واحد مرة في اول الدور وتلف فرصة الريسك على الكل
من حقك تغيير الكلر وطلب قطوع آخر غذا كنت هتتطلب ثمان لمات او اكثر ويعاد الكلر اللي انت قلبته في اخر اللعب بسكور عادي بدون دبل..
وأخيرا هذه قاعدة للمتعة والإثارة فقط .. اذا كان ثلاث اشخاص طالبين نفس الكول يكون السكور دبل
(اكرر نفس الكول ... مش اي طلب ..لا .. لازم يكون كول ... يعني لو طالبين 4 و 4 و4 و 3 ممكن لكن لو 6 و 2 و 2 و2 لأ )

الفروق بين السكور دة وبين الكلاسيكي
الكلاسيكي اكثر احترافية ويضفي متعة اكتر في السكور لكنه بطيء ف حسابه
الفرق اننا في المكسب بنضيف 13 بدل عشرة في اول دور والدور التاني 14 وهكذا
بحيث ان كل ما الادوار تمر كل ما يكون المكسب اهم من الادوار الأولى
وكمان بيتحسب الأونلي وينر بس لانه فيه ذكاء لكن الأونلي لوزر سهل جدا اي واحد يبيع يخسر حد معاه فمفيش داعي يتحسب عشان م\تحاول تلعب على مكسبك لآخر لحظة حتى لو كنت شايف انك هتخسر لوحدك
التمانية وانت طالع بتتحسب بعشرة زيادة بس عن الطلب العادي عشان مايبقاش في يأس لو واحد حقق تمانية واتنين وتفضل البولة مشتعلة
بعد الدور التلاتاشر بيتلعب دور تلاتشر داش اختلفوا كثيرا في لازمته .. لكن على ضمانتي هو دور بيتلعب في الحساب الكلاسيكي عادي جدا زي اي دور لكن ممنوع فيه الداش كول بس
اللي يتكلم اول واحد في دور الترفل مش اللي بعد اللي معاه اللي اتنين الترفل ولكن بحساب مين الللي عليه الدور منذ اول دور اول واحد اتكلم مين